రాజకీయ నాయకులెలా ఉంటారో పూర్తిగా అలాగే ఉంటా- కరాటే కళ్యాణి

 రాజకీయ నాయకులెలా ఉంటారో పూర్తిగా అలాగే ఉంటా- కరాటే కళ్యాణి

ఎపుడూ వివాదాస్పద వ్యాఖ్యలతో వార్తల్లో నిలిచే  బీజేపీ నాయకురాలు, హిందూత్వవాది, కమెడియన్ కరాటే కళ్యాణి  సంచలన స్టేట్‌మెంట్ ఇచ్చారు. పార్టీ మారితే బెస్ట్ అంటూ పోస్టు చేశారు. ‘చాలా రోజులుగా చూస్తున్నా.. నచ్చడం లేదు’ అని పేర్కొన్నారు. ఒకవేళ పార్టీ మారినా.. ప్రధాని నరేంద్ర మోదీకి మాత్రం మద్దతు కంటిన్యూ చేస్తానని కళ్యాణి వెల్లడించారు. అయితే, ‘మారే పార్టీని బట్టి’ అంటూ కండిషన్ పెట్టారు. మొత్తంమీద పార్టీ మారాలని మాత్రం నిర్ణయించుకున్నట్లు తెలుస్తోంది. ‘చాలా రోజులుగా చూస్తున్నా.. నచ్చడం లేదు. పార్టీ మారితే బెస్ట్ అనిపిస్తోంది. కానీ, మోదీ గారికి సపోర్ట్ చేస్తా మారే పార్టీని బట్టి. పూర్తిగా నా నిర్ణయం. పిచ్చి కామెంట్స్ పెట్టకండి’ అంటూ కరాటే కళ్యాణి ఫేస్‌బుక్ పేజీలో బుధవారం (జూలై 5) ఒక పోస్టు చేశారు. కళ్యాణి కోరినట్లే.. ఫాలోవర్స్ కూడా మంచి సలహాలు ఇస్తున్నారు.

టాలీవుడ్‌ నటిగా తెలుగు రాష్ట్రాల్లో గుర్తింపు సాధించిన కారాటే కళ్యాణి కొంత కాలం కిందట బీజేపీ పార్టీలో చేరిన సంగతి తెలిసిందే. ఆ పార్టీ తరఫున పలు కార్యక్రమాల్లో చురుగ్గా పాల్గొంటున్నారు. ముఖ్యంగా హిందువులు, హిందుత్వవాదంపై దాడి ఘటనలపై తన వాణిని బలంగా వినిపిస్తున్నారు. ఇటీవల ఖమ్మంలో కొంత మంది ప్రముఖులు ‘శ్రీకృష్ణుడి రూపంలో ఎన్టీఆర్’ విగ్రహాన్ని ఏర్పాటు చేసేందుకు తలపెట్టగా.. హిందూ, యాదవ సంఘాలతో కలిసి కరాటే కళ్యాణి ఆ ప్రయత్నానికి వ్యతిరేకంగా పోరాడిన సంగతి తెలిసిందే.

‘పార్టీ మారితే మీలోని హిందుత్వ భావాలకి తాళం పడుతుంది. లేదా మీరు ఆ పార్టీ సిద్దాంతాన్నే మార్చవలసి ఉంటుంది’ అంటూ మహాలక్ష్మి అనే నెటిజన్ కామెంట్ పెట్టారు. ఆ కామెంట్‌పై స్పందించిన కరాటే కళ్యాణి.. హిందుత్వం అంటూ స్వార్థం లేకుండా పనిచేస్తుంటే, మన వాళ్లే చాలా మాటలు అంటున్నారని ఆవేదన వ్యక్తం చేశారు. ‘నేను చేసే పనిలో అవగింజంత చెయ్యని వారు కూడా నన్ను అనడమే. ముందు మనం బాగుంటే అన్నీ చెయ్యొచ్చు’ అని పేర్కొన్నారు.

హిందుత్వం తన నరనరాల్లో ఉందని, అది ఎక్కడికి పోదని కరాటే కళ్యాణి స్పష్టం చేశారు. ‘ఇక సిద్ధాంతం అంటే, అది మార్చడం కష్టం. కానీ, ప్రయత్నం చెయ్యొచ్చు. ఇక ఏ పార్టీలో అయినా.. చిత్తశుద్ధి, పట్టుదల ఉంటే తప్పక రాణిస్తాం. హిందుత్వం కోసం చాలా మంది పెద్ద వారు ఉన్నారు కదా. నేను లేకున్నా పర్వాలేదు. మీరూ లేకున్నా ఓకే అనేవారూ ఉన్నారు. కాబట్టి పూర్తిగా రాజకీయ నాయకులు ఎలా ఉంటారో అలాగే ఉంటా. నేను నా జీవితం కోసం చూసుకోవాలి, త్యాగాలు అవసరం లేదు’ అని రాసుకొచ్చారు కళ్యాణి.

‘జనసేనలోకి మారిండి. మీరు పార్టీ మారినా మోదీ కి సపోర్ట్ చెయ్యండి. ఏమాత్రం తగ్గకుండా ఉంటుంది. కాబట్టి ఈ నిర్ణయం తీసుకోవాలని కోరుతున్నాను’ అని మరో నెటిజన్ సూచించారు. ‘అక్కా.. వద్దు. పార్టీ మారొద్దు. మీ లాంటి కరుడుగట్టిన హిందుత్వవాదికి బీజేపీ తప్ప మరే పార్టీ స్యూట్ కాదు. ఇప్పుడు జరుగుతున్న పరిమాణాలలో మేమంతా కూడా దిగ్భ్రాంతిలో ఉన్నాం. నెలా రెండు నెలల్లో అంతా సర్దుకుంటుంది’ అని మరొకరు సూచించారు.

‘మీ సిద్ధాంతం నాకూ నచ్చవు. కానీ మీలో చాలా ఉద్యమస్ఫూర్తి ఉంది. వెనకడుగు వెయ్యొద్దు. మీకు తెలుసా.. మీ శక్తి? మీ శత్రువులకు బాగా తెలుసు. మంచి సంస్థను ఎంచుకొని పోరాటం చేయండి. చరిత్రలో నిలిచి పోతారు’ అని మరొక నెటిజన్ సూచించారు. ‘పార్టీ మారి మతం కాకుండా, మానవత్వం కోసం పోరాడండి. మేమంతా మీ వెంట ఉంటాం’ అంటూ మరొకరు కామెంట్ పెట్టారు.

‘ప్రజా శాంతి పార్టీలోకి పొండి మేడం’ అని ఇంకో నెటిజన్ సూచించారు. ‘మీరు ఉంటే బీజేపీ.. మారాలంటే జనసేనకి మారండి. ఇక్కడైతే లేడీ సీఎం రేసులో ఉండొచ్చు’ అని మరొక నెటిజన్ సూచించారు. ‘మీరు ఏ పార్టీలోకి పోయినా ఆ పార్టీ అంతా గంగలో మునగాల్సిందే’ అని మరొకరు కామెంట్ పెట్టారు. ‘మీరే కొత్త పార్టీ పెట్టొచ్చు కదా..!’ అంటూ ఇంకొకరు సూచించడం కొసమెరుపు. ఇక కరాటే కళ్యాణి ఏ నిర్ణయం తీసుకుంటారో వేచి చూడాల్సిందే.