సినిమా సీన్ తలపించేలా ప్లాన్..కిడ్నాప్ కేసులో ఎన్నో ట్విస్ట్ లు

తెలంగాణలో సంచలనంగా మారిన డాక్టర్ వైశాలి కిడ్నాప్ కేసు.. ఓ ఇన్వెస్టిగేటివ్ జోనర్ సినిమాను తలపిస్తోంది. ఈ కేసులో రోజుకో కీలక విషయం వెలుగు చూస్తుండగా.. ఈ రోజు నిందితులను కస్టడీకి కోరుతూ పోలీసులు కోర్టుకు సమర్పించిన రిమాండ్ రిపోర్టులో మరిన్ని ఆసక్తికర అంశాలు వెలుగులోకి వచ్చాయి. అయితే.. ఈ కేసులో ఇప్పటికే 32 మందిని అదుపులోకి తీసుకున్న పోలీసులు.. అందులో ఏ3 భానుప్రకాశ్, ఏ4 సాయినాథ్, ఏ8 ప్రసాద్, ఏ9 హరి, ఏ30 విశ్వేశ్వర్‌ను 5 రోజుల కస్టడీకి ఇవ్వాలంటూ కోర్టులో కస్టడీ పిటిషన్ దాఖలు చేశారు. ఈ పిటిషన్‌లో పోలీసులు కీలక అంశాలను వెల్లడించారు. వైశాలిని కిడ్నాప్ చేసేందుకు నవీన్ రెడ్డి వారం రోజుల ముందు నుంచే ప్లాన్ చేసినట్టు పోలీసులు కస్టడీ పిటిషన్‌లో పేర్కొన్నారు. ఈ కిడ్నాప్‌లో నవీన్ రెడ్డితో పాటు రూమాన్, చందూ, సిద్దూ, సాయినాథ్, భానుప్రకాశ్ కలిసి మొత్తం ఆరుగురు కీలకంగా వ్యవహించారు. నిశ్చితార్థ సమయంలోనే కిడ్నాప్ చేయాలని కుట్ర పన్నారు. వైశాలితో పాటు చుట్టుపక్కల వారిని కూడా భయబ్రాంతులకు గురిచేయాలని ప్లాన్ వేశారు. మొత్తం 40 మందితో కలిసి కిడ్నాప్ ప్లాన్ చేశారు. ఒకవేళ దొరికిపోతే.. దృశ్యం సినిమాలోలా తప్పించుకునేందుకు నవీన్ రెడ్డి ముందే ప్లాన్ సిద్ధం చేసుకున్నాడు.

అయితే.. గతేడాది బొంగులూరులోని ఆర్డీ స్పోర్ట్స్ అకాడమీలో వైశాలికి నవీన్ రెడ్డితో పరిచయం ఏర్పడింది. ఈ క్రమంలోనే వైశాలి మొబైల్ నెంబర్ తీసుకొని నవీన్ రెడ్డి తరచూ ఫోన్ కాల్స్, మెసేజ్‌లు చేశాడు. పరిచయాన్ని అడ్డుగా పెట్టుకొని వైశాలితో కలిసి ఫొటోలు తీసుకున్నాడు. ఇద్దరి మధ్య స్నేహం కుదిరాక.. పెళ్లి చేసుకుంటానని ప్రపోజ్ చేశాడు. నవీన్ ప్రపోజ్‌కు స్పందిస్తూ.. తన తల్లిదండ్రులు ఒప్పుకుంటే వివాహం చేసుకుంటానని వైశాలి చెప్పింది. అయితే.. వైశాలి తల్లిదండ్రులను ఒప్పించేందుకు నవీన్ రెడ్డి అన్ని రకాలుగా ప్రయత్నించాడు. కానీ.. వాళ్లు పెళ్లికి అంగీకరించలేదు. దీంతో.. కక్ష పెంచుకున్న నవీన్ రెడ్డి.. వైశాలి పేరుతో నకిలీ ఇన్‌స్టాగ్రాం ఖాతా తెరిచి ఇద్దరూ దిగిన ఫొటోలను వైరల్ చేశాడు. ఐదు నెలల క్రితం వైశాలి ఇంటి ముందు స్థలాన్ని లీజుకు తీసుకొని తాత్కాలిక షెడ్డు వేసుకున్నాడు. ఆగస్టు 31న గణేష్ విగ్రహాన్ని ఏర్పాటు చేసి నిమజ్జనం సందర్భంగా న్యూసెన్స్ క్రియేట్ చేశాడు. వైశాలి ఫిర్యాదు చేయటంతో నవీన్ రెడ్డిపై పలు సెక్షన్ల కింద ఆదిబట్ల పోలీసులు కేసు నమోదు చేశారు.

ఇదిలా ఉండగానే.. వైశాలికి వేరే అతనితో పెళ్లి చేసేందుకు ఆమె తల్లిదండ్రులు నిశ్చయించారు. ఈ నెల 9వ తేదీన వైశాలికి నిశ్చితార్థం జరుగుతున్నట్లు నవీన్ రెడ్డి తెలుసుకున్నాడు. దీంతో.. వైశాలిని అపహరించి పెళ్లి చేసుకోవాలని కుట్ర పన్నాడు. దీనికోసం తన అనుచరులతో పాటు మిస్టర్ టీ స్టాళ్లలో పనిచేసే సిబ్బందిని ఉపయోగించుకున్నాడు. 9వ తేదీ 12 గంటల సమయంలో కార్లు, డీసీఎంలో వైశాలి ఇంటికి వచ్చిన నవీన్ రెడ్డి అనుచరులు.. ఇంటి ముందు నిలిపి ఉంచిన 5 కార్ల అద్దాలు ధ్వంసం చేశారు. వైశాలి ఇంట్లోకి వెళ్లి ఫర్నీచర్ అంతా ధ్వంసం చేసి.. సీసీ కెమెరాల డీవీఆర్‌ను ఎత్తుకెళ్లారు. వైశాలిని వోల్వో కారులో నల్గొండ వైపు తీసుకెళ్లారు. ఈ క్రమంలో.. నవీన్ రెడ్డి, అతని అనచురులు ముందుగానే ఫోన్లు స్విచాఫ్ చేసి పెట్టుకున్నారు. కాగా.. మార్గమధ్యలో నవీన్ రెడ్డి స్నేహితుడు రుమాన్ ఫోన్ ఆన్ చేయగా.. పోలీసులు వెతుకున్నట్లు సామాజిక మాధ్యమాల ద్వారా తెలుసుకున్నారు. ఇదే విషయాన్ని నవీన్ రెడ్డికి చెప్పి.. వైశాలిని వదిలిపెడదామని చెప్పాడు.

ఇంకేముంది.. నల్గొండ సమీపంలో కారు నుంచి నవీన్ రెడ్డి, అతని ముగ్గురు స్నేహితులు దిగిపోయారు. అదే కారులో.. వైశాలిని హైదరాబాద్‌కు తీసుకొచ్చిన రుమాన్ అక్కడ వదిలేసి వెళ్లిపోయాడు. 9వ తేదీన సాయంత్రం 6.35 కి తాను క్షేమంగా ఉన్నట్లు తండ్రికి వైశాలి ఫోన్ చేసింది. మన్నెగూడలో ఉన్నట్టు చెప్పటంతో.. రాత్రి 8.37 నిమిషాలకు అక్కడికి వెళ్లి వైశాలిని పోలీసులు, కుటుంభసభ్యులు కలిసి ఇంటికి తీసుకొచ్చారు. వైశాలి తండ్రి ఇచ్చిన ఫిర్యాదు మేరకు పలు సెక్షన్ల కింద కేసు నమోదు చేసిన పోలీసులు.. ఇప్పటికే 32 మందిని అరెస్ట్ చేశారు. పరారీలో ఉన్న నవీన్ రెడ్డితో పాటు మరో ముగ్గురి కోసం గాలిస్తున్నారని కస్టడీ పిటిషన్‌లో సవివరంగా పేర్కొన్నారు.

Axact

Jaano Jaago

ఆన్‌లైన్ తాజా తెలుగు వార్తలు తెలంగాణ మరియు ఆంధ్రప్రదేశ్ | jaanojaago.com

Post A Comment:

0 comments: