గురుకుల ఉపాధ్యాయ నియామకాల్లో పార్ట్ టైం, గెస్ట్, అవుట్ సోర్సింగ్ ఉపాధ్యాయులకు,, నియామకాల్లో సర్వీస్ వెయిటేజి ఇవ్వాలి - టిఎస్ యుటిఎఫ్ డిమాండ్

 గురుకుల ఉపాధ్యాయ నియామకాల్లో పార్ట్ టైం, గెస్ట్, అవుట్ సోర్సింగ్ ఉపాధ్యాయులకు,,

నియామకాల్లో సర్వీస్ వెయిటేజి ఇవ్వాలి 

- టిఎస్ యుటిఎఫ్ డిమాండ్

(జానో జాగో వెబ్ న్యూస్-హైదరాబాద్ ప్రతినిధి)

గురుకుల ఉపాధ్యాయ నియామకాల్లో పార్ట్ టైం, గెస్ట్, అవుట్ సోర్సింగ్ ఉపాధ్యాయులకు నియామకాల్లో సర్వీస్ వెయిటేజి ఇవ్వాలని టిఎస్ యుటిఎఫ్ డిమాండ్ చేసింది. ఈ మేరకు రాష్ట్ర ప్రభుత్వ ప్రధాన కార్యదర్శికి వినతిపత్రం అందజేశారు. ఎమ్మెల్సీ ఎ నర్సిరెడ్డి, టిఎస్ యుటిఎఫ్ సీనియర్ నాయకుడు పి మాణిక్ రెడ్డి  రిక్రూట్ మెంట్ బోర్డు చైర్మన్ రోనాల్డ్ రోస్ తో కలిసి టిఎస్ యుటిఎఫ్ రాష్ట్ర అధ్యక్ష, ప్రధాన కార్యదర్శులు కె జంగయ్య, చావ రవి వినతిపత్రం అందజేసి చర్చించారు. ఈ సందర్భంగా వారు మాట్లాడుతూ... తెలంగాణ రాష్ట్రప్రభుత్వం వివిధ సంక్షేమ శాఖల సొసైటీల ఆధ్వర్యంలో నెలకొల్పిన వందలాది గురుకుల విద్యాసంస్థల్లో వేలాదిమంది అర్హత కలిగిన ఉపాధ్యాయులు తాత్కాలిక ప్రాతిపదికన పనిచేస్తున్నారు. వారికి గురుకుల ఉపాధ్యాయుల నియామకాల్లో సర్వీసు వెయిటేజి ఇవ్వాలని తెలంగాణ రాష్ట్ర ఐక్య ఉపాధ్యాయ ఫెడరేషన్ (టిఎస్ యుటిఎఫ్) కోరుతున్నది.

మహాత్మా జ్యోతిరావు ఫూలే తెలంగాణ వెనుకబడిన తరగతుల గురుకుల విద్యా సంస్థల్లో గెస్ట్ టీచర్లు, సాంఘీక సంక్షేమ, గిరిజన సంక్షేమ, జనరల్ రెసిడెన్షియల్ విద్యాసంస్థల్లో పార్ట్ టైం, మైనారిటీ సంక్షేమ విద్యాసంస్థల్లో ఔట్ సోర్సింగ్ తదితర పేర్లతో తాత్కాలిక ఉపాధ్యాయులు పనిచేస్తున్నారు. వీరిని మెరిట్ మరియు డెమో ఆధారంగా ఎంపిక చేశారు. ప్రతి సంవత్సరం సామర్థ్యాన్ని పరీక్షించి రెన్యూవల్ చేస్తున్నారు.

పేరుకు పార్ట్ టైం/ గెస్ట్/ ఔట్ సోర్సింగ్ అయినా వారు పాఠశాలల్లో పూర్తికాలం పనిచేస్తున్నారు. రెగ్యులర్ ఉపాధ్యాయులతో సమానంగా హౌజ్ మాస్టర్, కేర్ టేకర్, సూపర్వైజరీ స్టడీ, నైట్ స్టే, హాలిడే డ్యూటీ, ఎస్కార్ట్ తదితర అన్నిరకాల విధులను నిర్వహిస్తున్నారు. వారు గురుకుల విద్యాసంస్థల్లోని పని పద్ధతులకు అలవాటు పడి, అనుభవం కలిగి, విద్యార్థులతో అనుబంధం కలిగి ఉన్నారు. కనుక వారి సేవలను గురుకులాల్లోనే శాశ్వత ప్రాతిపదికన ఉపయోగించుకోవటం సమంజసంగా ఉంటుందని టిఎస్ యుటిఎఫ్ రాష్ట్ర అధ్యక్ష, ప్రధాన కార్యదర్శులు కె జంగయ్య, చావ రవి అన్నారు.

తెలంగాణ గురుకుల విద్యాసంస్థల ఉపాధ్యాయ నియామకాల బోర్డు ఆధ్వర్యంలో సంక్షేమ గురుకుల విద్యాసంస్థల్లో జరిగే ఉపాధ్యాయ నియామక ప్రక్రియలో ప్రస్తుతం గురుకుల విద్యాసంస్థల్లో పనిచేస్తున్న పార్ట్ టైం, గెస్ట్ ఔట్ సోర్సింగ్ ఉపాధ్యాయులకు వారు చేసిన సర్వీసు ప్రతిపదికన వెయిటేజి/ ప్రాధాన్యత ఇవ్వాలని  రాష్ట్ర ముఖ్యమంత్రి ని వారు కోరారు.