మతిలేని జీవోతో ముగ్గురిని పొట్టన పెట్టుకొంది


(జానో జాగో వెబ్ న్యూస్-హైదరాబాద్ బ్యూరో)

రాష్ట్ర ప్రభుత్వం విడుదల చేసిన మతిలేని జీవో ముగ్గురిని పొట్టనబెట్టుకుందని బీజేపీ ఎంపీ ధర్మపురి అర్వింద్ అన్నారు. ఉద్యోగ బదిలీతో మనస్థాపానికి గురైన నిజామాబాద్ జిల్లా భీంగల్ మండలం బాబాపూర్‌కి చెందిన టీచర్ సరస్వతి ఆత్మహత్య ఘటనపై ఆయన ఘాటుగా స్పందించారు. రాష్ట్ర ప్రభుత్వం విడుదల చేసిన మతిలేని జీవో ముగ్గురిని పొట్టనబెట్టుకుందని ఆయన అన్నారు. నిజామాబాద్ జిల్లాలో టీచర్ సరస్వతి, ములుగు జిల్లాలో మరో యువ మహిళా ఉద్యోగి సహా మరొకరు ఆత్మహత్యలు చేసుకున్నారని ఆవేదన వ్యక్తం చేశారు. కనీసం ఉద్యోగులతో సంప్రదింపులు జరపకుండా జీవో తెచ్చారని అర్వింద్ మండిపడ్డారు. ఉద్యోగ సంఘాలతో చర్చించి జీవోకి సవరణలు చేయాలని.. కొత్త జీవో విడుదల చేయాలని ఆయన డిమాండ్ చేశారు. జీవో 317తో అందరినీ కన్ఫ్యూజన్‌లోకి నెట్టేశారని.. అదే టీచర్ సరస్వతి విషయంలో జరిగిందన్నారు. ఆమెను కామారెడ్డి జిల్లాకు బదిలీ చేశారని.. ఇప్పుడు వెళ్తే మళ్లీ తిరిగి సొంత జిల్లాకు రావడం కుదురుతుందో లేదో తెలియక ఆమె అఘాయిత్యానికి పాల్పడ్డారని ఎంపీ అన్నారు. ఉద్యోగులను బలి తీసుకుంటున్న ఈ జీవోని తక్షణం సవరించాలని ఎంపీ అన్నారు. చనిపోయిన వారి కుటుంబాలను పలకరిద్దామనుకున్నా పోలీసులు ఒప్పుకోవడం లేదన్నారు. మీరు ఎప్పుడు చెబితే అప్పుడే వెళ్తానని నిజామాబాద్ కమిషనర్‌కి చెప్పినా పోనివ్వడం లేదని ఆగ్రహం వ్యక్తం చేశారు. ఒక మతిలేని.. కన్ఫ్యూజ్డ్ జీవోతో ఉద్యోగులు ఆత్మహత్యలు చేసుకున్నారని ఆయన అన్నారు. జిల్లాల పునర్విభజన జరిగినప్పుడే ఉద్యోగుల కేటాయింపు ఎలా చేస్తారో తెలియజేయాలని కేంద్రం కోరిందన్నారు. మూడేళ్లు ఫాంహౌస్‌లో పడుకుని ఇప్పుడు ఆగమేఘాల మీద ఈ జీవో తెచ్చారని ఎంపీ అర్వింద్ మండిపడ్డారు. స్థానికత, సీనియారిటీలో అవకతవకలు జరిగాయని.. జీవోని సవరించి కొత్త జీవో విడుదల చేయాల్సిందేనని ఆయన డిమాండ్ చేశారు.

Axact

Jaano Jaago

ఆన్‌లైన్ తాజా తెలుగు వార్తలు తెలంగాణ మరియు ఆంధ్రప్రదేశ్ | jaanojaago.com

Post A Comment:

0 comments: