యూపీ కాంగ్రెస్ అభ్యర్థి ఖరారు


యూపీ రాష్ట్ర కాంగ్రెస్ పార్టీ సీఎం అభ్యర్థి ప్రియాంకా వాద్రా దాదాపు ఖాయమని బలమిస్తోంది. ఈ రకమైన  వ్యాఖ్యలు స్వయంగా ప్రియాంకా వాద్రా చేయడంతో ఆ వాదనకు బలం చేకూరింది. వచ్చే నెల జరగనున్న ఉత్తర్ ప్రదేశ్ అసెంబ్లీ ఎన్నికల్లో కాంగ్రెస్ పార్టీ ముఖ్యమంత్రి అభ్యర్ధి ఎవరు? అనేది జోరుగా చర్చ జరుగుతోంది. కాంగ్రెస్ నాయకురాలు ప్రియాంక గాంధీ వాద్రాను సీఎం అభ్యర్థిగా ప్రకటిస్తారని గత కొంతకాలంగా ఊహాగానాలు వినబడుతున్నాయి. తాజాగా ఈ విషయాన్ని ప్రియాంక గాంధీ తానే సీఎం అభ్యర్థినని పరోక్షంగా వ్యాఖ్యలు చేశారు. దీంతో కాంగ్రెస్‌ ముఖ్యమంత్రి అభ్యర్థిగా ఆమె పేరు దాదాపు ఖాయంగానే కన్పిస్తోంది. యూపీ అసెంబ్లీ ఎన్నికలకు సంబంధించి శుక్రవారం యూత్ మేనిఫేస్టోను కాంగ్రెస్‌ అగ్రనేతలు రాహుల్‌ గాంధీ, ప్రియాంక గాంధీ వాద్రా విడుదల చేశారు. అనంతరం ఇరువురూ మీడియాతో మాట్లాడారు. ఈ సందర్భంగా కాంగ్రెస్‌ సీఎం అభ్యర్థి ఎవరన్న ప్రశ్నకు ప్రియాంక స్పందిస్తూ.. ‘‘ఇంకెవరైనా కన్పిస్తున్నారా? మరి ఇంకేంటీ? ఎక్కడ చూసినా నేనే కన్పిస్తున్నానుగా..! చూడట్లేదా?’’ అని ఆసక్తికర సమాధానం ఇచ్చారు. అయితే ఎన్నికల్లో పోటీపై ఇంకా ఎలాంటి నిర్ణయం తీసుకోలేదని ఆమె తెలిపారు. ప్రియాంక వ్యాఖ్యలతో ముఖ్యమంత్రి అభ్యర్థిగా ఆమె పేరునే ప్రకటించడం దాదాపు ఖాయంగానే కన్పిస్తోంది. త్వరలోనే కాంగ్రెస్‌ దీనిపై అధికారిక ప్రకటన చేయనున్నట్టు తెలుస్తోంది. ఒకవేళ కాంగ్రెస్‌ మెజార్టీ స్థానాల్లో గెలిస్తే.. ప్రత్యక్ష ఎన్నికల్లో పోటీ చేయనప్పటికీ ప్రియాంక సీఎంగా పగ్గాలు చేపట్టి.. ఆరు నెలల్లోగా చట్టసభకు ఎన్నికవ్వాల్సి ఉంటుంది. గతంలో యూపీ ముఖ్యమంత్రులుగా బాధ్యతలు చేపట్టిన మాయావతి, అఖిలేశ్‌ యాదవ్‌, సీఎం యోగి ఆదిత్యనాథ్‌ కూడా ఎమ్మెల్సీనే కావడం గమనార్హం. అయితే, ప్రస్తుత ఎన్నికల్లో యోగి ఆదిత్యనాథ్, అఖిలేశ్‌‌లు అసెంబ్లీ స్థానాల నుంచి పోటీకి దిగుతున్నారు. గోరఖ్‌పూర్‌ నుంచి యోగి.. ములాయం కుటుంబానికి కంచుకోట మెయిన్‌పురిలోని కర్హాల్‌ నియోజకవర్గం నుంచి అఖిలేష్ పోటీ చేస్తున్నారు. కాగా, పార్టీ కోరితే తాను ఎన్నికల్లో పోటీకి సిద్ధమేనంటూ గత సార్వత్రిక ఎన్నికలకు ముందు మీడియా అడిగిన ప్రశ్నలకు ప్రియాంక సమాధానం ఇచ్చారు. ఉత్తరప్రదేశ్‌లో బీజేపీని మళ్లీ అధికారంలోకి రాకుండా అడ్డుకోడానికి ఎన్నికల అనంతరం పొత్తుల గురించి నిర్ణయం తీసుకుంటారా? అని ప్రశ్నించగా ‘‘అలాంటి పరిస్థితులు తలెత్తితే దానిని పరిగణనలోకి తీసుకోవడానికి సిద్ధంగా ఉంటాం... మహిళలు, యువత అభివృద్ధి కోసం ఎజెండాను నెరవేర్చాలని మేము కోరుకుంటున్నాం’’ అని అన్నారు. 403 అసెంబ్లీ స్థానాలున్న యూపీలో ఫిబ్రవరి 10 నుంచి మార్చి 7 వరకు ఏడు విడతల్లో ఎన్నికలు జరగనున్నాయి. మార్చి 10న ఫలితాలు వెల్లడించనున్నారు. 2024 సార్వత్రిక ఎన్నికలకు సెమీ ఫైనల్‌గా భావించే ఈ ఎన్నికలు యావత్‌ దేశాన్ని ఆకర్షిస్తున్నాయి.

Axact

Jaano Jaago

ఆన్‌లైన్ తాజా తెలుగు వార్తలు తెలంగాణ మరియు ఆంధ్రప్రదేశ్ | jaanojaago.com

Post A Comment:

0 comments: