మహాత్మా గాంధీ వర్ధంతిని మతసామరస్య దినంగా జరపండి

తెలంగాణ ఆవాజ్ రాష్ట్ర కమిటీ పిలుపు

(జానో జాగో వెబ్ న్యూస్-హైదరాబాద్ బ్యూరో)

మతసామరస్యం, లౌకికవాదం, దేశ సమైక్యత కోసం ప్రాణత్యాగం చేసిన మహాత్మా గాంధీ వర్ధంతి రోజును (జనవరి 30ని) 'మతసామరస్య దినం'గా జరపాలని ఆవాజ్ తెలంగాణ రాష్ట్ర కమిటీ పిలుపునిస్తున్నది. ఈ మేరకు ఆవాజ్ కమిటీ తెలంగాణ రాష్ట్ర అధ్యక్షులు ప్రొఫెసర్ మహమ్మద్ అన్సారీ, ప్రధాన కార్యదర్శి మహమ్మద్ అబ్బాస్ ఓ‌ ప్రకటన విడుదల చేశారు.  జనవరి 30, 1948 లో నాథూరామ్ గాడ్సే మహాత్మా గాంధీని మత విద్వేషంతో దారుణంగా హత్య చేశాడు. గాంధీజీ దేశ స్వాతంత్రం కోసం అకుంఠిత దీక్షతో ఉద్యమం నడిపి స్వాతంత్ర్య సమరంలో కీలక భూమిక పోషించారు.  దేశంలో ప్రజలంతా మతవిశ్వాసాలకు అతీతంగా కలిసి మెలిసి జీవించాలని కలలు కన్నాడు. మత రాజ్యం కాకుండా సర్వమతాల సమాహారంగా ఉండే లౌకిక దేశంగా భారత్ ఉండాలని కోరుకున్నారు. మతోన్మాద సిద్ధాంతంతో స్ఫూర్తి పొందిన గాడ్సే దేశానికి గాంధీజీ చేసిన సేవలను విస్మరించి ఆయనను  దారుణంగా హతమార్చాడు.  గాంధీజీ హత్యకు మత రాజకీయాలే కారణం. దేశంలో ప్రస్తుతం మత రాజకీయాలు ఉచ్చస్థితికి చేరాయి. రాజ్యాంగ బద్ద పదవులలో ఉన్నవారే రాజకీయ ప్రయోజనాల కోసం బాధ్యతారాహిత్యంగా మత విద్వేషం, అసహనంతో రెచ్చగొట్టే వ్యాఖ్యలు చేస్తున్నారు.  లౌకిక  ప్రజాస్వామిక విలువలను, రాజ్యాంగాన్ని కాలరాస్తున్నారు. ఈ నేపథ్యంలో గాంధీ ఆచరించిన లౌకికవాదం, ప్రదర్శించిన మతసామరస్యం దేశానికి ఎంతో అవసరం. ఆయన వర్థంతి రోజును మత సామరస్య దినంగా జరపండం ద్వారా   మతోన్మాదాన్ని ఎదిరించాలని, ప్రజలలో మత సామరస్యం గురించి ప్రచారం చేయాలని కోరుతున్నాం. అని వారు ఆ ప్రకటనలో కోరారు.

Axact

Jaano Jaago

ఆన్‌లైన్ తాజా తెలుగు వార్తలు తెలంగాణ మరియు ఆంధ్రప్రదేశ్ | jaanojaago.com

Post A Comment:

0 comments: