కరోనా ఉగ్రరూపం...ముడున్నర లక్షలకు పైగా కేసులు


కరోనా శాంతించడం అనే మాట ఇపుడు వినిపించడంలేదు. దేశంలో కరోనా మహమ్మారి రోజు రోజుకూ ఉగ్రరూపం దాల్చుతోంది. ఎనిమిది నెలల తర్వాత గురువారం రోజువారీ కేసులు 3 లక్షలు దాటగా.. శుక్రవారం ఆ సంఖ్య మరింత పెరిగింది. గడచిన 24 గంటల్లో దేశవ్యాప్తంగా 3,47,254 మంది కొత్తగా వైరస్ బారినపడ్డారు. మొత్తం 19 లక్షల మందికి కోవిడ్ నిర్దారణ పరీక్షలు నిర్వహించగా.. దాదాపు మూడున్నర లక్షల మందికి వైరస్ పాజిటివ్‌గా నిర్ధారణ అయ్యింది. దీంతో దేశంలో పాజిటివిటీ రేటు 17.94 శాతానికి చేరింది. వైరస్ నుంచి మరో 2.52 లక్షల మంది కోలుకున్నారు. రోజువారీ కేసుల్లో కర్ణాటక, కేరళ, మహారాష్ట్ర మొదటి మూడు స్థానాల్లో ఉన్నాయి. ఈ మూడు రాష్ట్రాల్లోనే దాదాపు 1.40 లక్షల కేసులు నమోదవడం గమనార్హం. అటు,, దేశంలో కొత్తరకం వేరియంట్ ఒమిక్రాన్ బాధితుల సంఖ్య 9,692కు చేరింది. అటు కోవిడ్ మరణాల సంఖ్య కూడా పెరుగుతోంది. మహమ్మారితో మరో 703 మంది ప్రాణాలు కోల్పోయారు. వీటిలో అత్యధికంగా కేరళలోనే చోటుచేసుకున్నాయి. అయితే, కేరళ కొంతకాలంగా గతంలో మరణాలను సవరిస్తుండటంతో ఆ ప్రభావం మృతుల సంఖ్యపై పడింది. దేశంలో ఇప్పటి వరకూ మొత్తం 3.85 కోట్ల మందికి కరోనా సోకగా.. 4,88,396 మంది ప్రాణాలు కోల్పోయారని కేంద్ర ఆరోగ్య శాఖ వెల్లడించింది. రోజువారీ కేసులు భారీగా నమోదుకావడంతో యాక్టివ్ కేసులు కొండలా పెరుగుతున్నాయి. ప్రస్తుతం యాక్టివ్ కేసులు 20,18,825కి చేరడంతో.. యాక్టివ్ కేసుల రేటు 5.23 శాతానికి పెరిగింది. గత 24 గంటల వ్యవధిలో 2,51,777 మంది కొవిడ్ నుంచి కోలుకోగా.. మొత్తం రికవరీలు 3.6 కోట్లుగా ఉన్నాయి. రికవరీ రేటు 93.50 శాతానికి పడిపోయింది. ప్రపంచవ్యాప్తంగా కరోనా కల్లోలం కొనసాగుతోంది. నిన్న ఒక్కరోజే 35 లక్షలకుపైగా కొత్త కేసులు నమోదుకాగా.. మరో 9 లక్షల మందికిపైగా ప్రాణాలు కోల్పోయారు. ప్రపంచవ్యాప్తంగా మొత్తం కొవిడ్ కేసులు 34,29,21,778కి చేరగా.. మరణాలు 55,92,788కి పెరిగింది. అగ్రరాజ్యం అమెరికాలో సునామీలా విరుచుకుపడుతోన్న కరోనా.. విలయం సృష్టిస్తోంది.

Axact

Jaano Jaago

ఆన్‌లైన్ తాజా తెలుగు వార్తలు తెలంగాణ మరియు ఆంధ్రప్రదేశ్ | jaanojaago.com

Post A Comment:

0 comments: