5 జీ ఫలితం....ఆగిన ఎయిరిండియా సర్వీసులు


5జీ పై ఇపుడు ప్రపంచవ్యాప్తంగా ప్రత్యేక చర్చ సాగుతోంది. గందరగోళం నడుమే అమెరికాలో 5జీ సేవలు బుధవారం ప్రారంభమయ్యాయి. ఏటీ అండ్‌ టీ, వెరైజన్‌ టెలికాం సంస్థలు 5జీ సేవలను అందుబాటులోకి తీసుకొచ్చాయి. విమాన సర్వీసులకు అంతరాయం లేకుండా ఈ సేవలను ప్రారంభించాయి. విమానయాన సంస్థల అభ్యంతరాలతో అమెరికాలోని కొన్ని విమానాశ్రయాల పరిసరాల్లో 5జీ సర్వీసులను ఏటీ అండ్‌ టీ, వెరిజాన్ టెలికాం సంస్థలు తాత్కాలికంగా నిలిపేశాయి. మిగితా చోట్ల మాత్రం సేవల్ని ప్రారంభించినట్లు ఆ సంస్థలు వెల్లడించాయి. బుధవారం నుంచి 5జీ సేవలు ప్రారంభించనున్నట్లు తెలియడంతో ప్రపంచ వ్యాప్తంగా ప్రధాన విమానయాన సంస్థలు అమెరికాకు వెళ్లాల్సిన విమానాలను రీషెడ్యూల్‌ చేశాయి. ఎయిరిండియా సైతం అమెరికాకు వెళ్లాల్సిన కొన్ని విమానాలను నడపలేకపోతున్నామని ట్విటర్‌ వేదికగా ప్రకటించింది. 3.7- 3.98 గిగాహెర్ట్జ్‌ ఫ్రీకెన్సీ బ్యాండ్లలో 5జీ సేవల నిర్వహణకు గతేడాది వెరైజన్‌, ఏటీ అండ్‌ టీ రూ.లక్షల కోట్ల విలువైన కాంట్రాక్టను దక్కించుకున్నాయి. వాస్తవానికి అమెరికాలో 5జీ సేవలు 2021 డిసెంబరు 5 నుంచి ప్రారంభం కావాల్సి ఉంది. దాదాపు నెల రోజుల ఆలస్యంగా అందుబాటులోకి వచ్చాయి. మరోవైపు, 5 జీ సేవలు ప్రారంభమైన 36 గంటల్లోగా విమానయాన రంగంలో సంక్షోభం ఏర్పడుతుందని అమెరికా పౌర, సరుకు రవాణా విమాన సేవల సంస్ధలు పేర్కొన్నాయి. విమానాల్లో ఉండే సున్నితమైన ఆల్టీమీటర్లను 5 జీ సేవలు ప్రభావితం చేసే అవకాశం ఉందని ఎఫ్ఏఏ హెచ్చరించింది. తక్కువ దృశ్యమానంలో కార్యకలాపాలు సాగించే విమానాలు పూర్తిగా నిలిచిపోతాయని పేర్కోంది. దీని ప్రభావంతో వందలాది విమానాలు నిలిచిపోయి వేలాదిగా ప్రయాణికులు ఎక్కడి కక్కడే చిక్కుకుపోతారని విమానయాన సంస్ధలు పేర్కొన్నాయి.

Axact

Jaano Jaago

ఆన్‌లైన్ తాజా తెలుగు వార్తలు తెలంగాణ మరియు ఆంధ్రప్రదేశ్ | jaanojaago.com

Post A Comment:

0 comments: