ఏపీ రూ.1392 కోట్ల 23 లక్షల రుణం:నాబార్డ్


ఆంధ్రప్రదేశ్‌కు 1392 కోట్ల 23 లక్షల రూపాయల రుణం మంజూరు చేసినట్లు నాబార్డు చీఫ్ జనరల్ మేనేజర్ సుధీర్ కుమార్ జన్నావర్ తెలిపారు. కడప, విజయనగరం, తూర్పు గోదావరి జిల్లాల్లో మూడు నూతన వైద్య కళాశాలలు కమ్ ఆసుపత్రులు నిర్మాణానికి, శ్రీకాకుళం, విజయనగరం, తూర్పు, పశ్చిమ గోదావరి, ప్రకాశం జిల్లాలోని ఐటీడీఏ ప్రాంతాల్లో 5 మల్టీ స్పెషాలిటీ ఆసుపత్రులు నిర్మాణానికి ఈ రుణం మంజూరు చేసిందన్నారు. నాబార్డు రూరల్ ఇన్‌ఫ్రాస్టక్చర్ డెవలప్‌మెంట్ ఫండ్ (RIDF) కింద అందిస్తున్న ఈ సహాయం ఆంధ్రప్రదేశ్ రాష్ట్రంలో వైద్యపరమైన సౌకర్యాలు మెరుగవడంతో పాటు ముఖ్యంగా గిరిజనులకు సకాలంలో మెరుగైన వైద్య సేవలందించేందుకు ఎంతగానో దోహదం చేస్తుందని చెప్పారు. కడప, విజయనగరం, తూర్పు గోదావరి జిల్లాల్లో నూతనంగా ఏర్పాటు కానున్న మూడు వైద్య కళాశాలలు కమ్ ఆసుపత్రుల్లో మేజర్ ఆపరేషన్ థియేటర్, క్లినికల్ ఓపీడీలు, డయాలిసిస్, బర్న్ వార్డు, క్యాజువాలిటీ వార్డు, స్పెషలైజ్డ్ క్లినికల్ కమ్ సర్జికల్ వార్డు, ఆక్సిజన్ ప్లాంటు వంటి సౌకర్యాలు అందుబాటులోకి వస్తాయని సుధీర్ కుమార్ జన్నావర్ తెలిపారు. అదేవిధంగా వైద్య విద్యకు సంబంధించి మెరుగైన నాణ్యతా ప్రమాణాలతో కూడిన మౌలిక సదుపాయాలు కల్పించనున్నట్లు వెల్లడించారు. ఆంధ్రప్రదేశ్‌లో విద్య, వైద్య రంగాల్లో మెరుగైన మౌలిక సదుపాయాలను అందుబాటులోకి తీసుకువచ్చేందుకు రాష్ట్ర ప్రభుత్వం చేస్తున్న కృషికి నాబార్డు తగిన తోడ్పాటును అందిస్తుందని చెప్పారు. ఆంధ్రప్రదేశ్ రాష్ట్ర ప్రభుత్వం విద్యాపరమైన మౌలిక సదుపాయాల అభివృద్ధికి ఇప్పటికే చేపట్టి అమలు చేస్తున్న నాడు-నేడు కార్యక్రమానికి నాబార్డు ద్వారా 3 వేల 92 కోట్ల రూపాయలు సహాయం అందించిందని ఆయన తెలిపారు. ఈ నిధులతో 25 వేల 648 పాఠశాలల్లో అదనపు తరగతి గదులు నిర్మాణం, మరుగుదొడ్లు, తాగునీటి సౌకర్యం వంటి వసతులు కల్పించారని చెప్పారు. అలాగే అంగన్‌వాడీ కేంద్రాలు, ఇంటిగ్రేటెడ్ అగ్రి ఆక్వా ల్యాబ్స్ ఏర్పాటుకు కూడా నాబార్డు సహాయం అందిస్తుందని నాబార్డు సీజీఎం సుధీర్ కుమార్ జన్నావర్ వెల్లడించారు.

Axact

Jaano Jaago

ఆన్‌లైన్ తాజా తెలుగు వార్తలు తెలంగాణ మరియు ఆంధ్రప్రదేశ్ | jaanojaago.com

Post A Comment:

0 comments: